Subling nagpahimangno ang City Transport and Traffic Management Office kon CTTMO ang pagpatuman sa pagpasirado sa dalan sa Davao Coastal – Bucana Bridge karong adlawa hangtud Pebrero 17, 2026 alang sa pagsaulog sa Chinese New Year.
Sumala sa mga awtoridad, ipatuman ang partial road closure (usa ka lane lamang ang maagian) gikan Pebrero 14 hangtod 16 alang sa rehearsal ug ingress.
Samtang ang full road closure gikan sa Tulip Rotonda hangtod Roxas Rotonda ipatuman gikan alas 2:00 sa hapon hangtod alas 9:00 sa gabii sa Pebrero 16 panahon sa main event.
Human niini, mobalik ang partial closure alang sa kalihukan hangtod alas 12:00 sa udto sa Pebrero 17. Ang gitakdang drop-off area alang sa publiko adto sa CTTMO Outpost duol sa venue, samtang ang parking anaa sa open space duol sa Tulip Drive Rotonda sa Ecoland area, nga mao usab ang bugtong entry point alang sa mga sakyanan ug walk-in guests.
Giawhag ang publiko nga magplano daan, mosunod sa mga traffic enforcer, ug makigtambayayong aron masiguro ang hapsay nga dagan sa trapiko panahon sa selebrasyon. Ang pagsirado sa maong tulay ang gibase sa City Ordinance No. 0162-26, Series of 2026.
