DAVAO CITY – Mihatag ug katin-awan si City Tourism and Operations Office (CTOO) chief, Generose Tecson nga nagpabilin nga rekisitos ang negative result sa reverse transcription-polymerase chain reaction (RT-PCR) nga dili mosobra sa 72 ka oras sukad nga kini gikuha alang sa tanan nga mga biyahedor sa siyudad kini tungod pabilin pa gihapon nga mipatigbabaw karon ang “Test Before Travel” ordinance ilalom sa General Community Quarantine (GCQ).
Sumala pa kang Tecson, hugtanon nga gipatuman karon ang mga rekisitos alang sa negative RT-PCR test sa tanan nga mga pasahero nga mosulod sa Francisco Bangoy International Airport. Kinahanglan nga mo-presenta ug negative test results ang mga nahisgutan ayha ang ilang biyahe paingon sa siyudad ingon man kinahanglan nga mokuha ang mga nahisgutan ug Safe Davao QR Code nga mamahimong ma-access pinaagi sa: https://profiles.safe-davao.com/.
Ang mga International passengers nga moabot sa Francisco Bangoy International Airport ug magpositibo sa COVID 19 human ang required/repeat RT-PCR testing, ang ipailalom sa isolation sa VAN City.
Kinahanglan sab sumala pa nga magpa-rehistro ang mga Overseas Filipino Workers (OFWs) sa Overseas Workers Welfare Administration (OWWA) alang sa hotel assignment. Ginapahigayon sab ang reservations sa swabbing sulod sa Davao airport.
