DAVAO CITY- Nagpadayon ang paghatud og serbisyo sa Davao City Social Welfare and Development Office (CSWDO) ngadto sa mga kanhi rebelde aron mapakusgan pa ang ilang ekonomikanhong kapasidad ug maandam ang mga nahisgutan alang sa subling pag-integrate sa komunidad pinaagi sa Kalinaw Village.
Gikanayon ni CSWDO Technical Assistant Ms. Bevce Mari Ticon, nga gikan niadtong tuig 2019, nakahimo na sa pag cater ang Kalinaw Village og kinatibuk-ang 353 ka mga kanhi rebelde ug nakapahigayon na og nagkadaiya nga mga trainings aron matabangan ang mga nahisgutan nga makabalik sa komunidad.
Gatanyag sab ang Kalinaw Village og spiritual ug religious activities, ingon man gahatag sab og psychosocial intervention, educational assistance, ug skills training pinaagi sa pakig-alayon sa mga nagkadaiyang national government offices. Dugang pa sa opisyal nga ning kasamtangan, anaa sa 60 anyos ang pinaka-edaran nga nanimuyo sa Kalinaw Village samtang aduna sab mga indibidwal nga anaa sa 20 hangtud 30 anyos ang pangidaron.
Gawas pa niini, gibutyag sab ni Ticon nga adunay usa ka babae sa Kalinaw Village ang bag-ohay lamang nanganak. Giklaro ni Ticon nga ipailalom sa assessment ang mga nahisgutan aron masuta kung andam naba kining ma reintegrate sa komunidad ug kana pinaagi sa pagpahigayon og interviews.
