DAVAO CITY – Nagaawhag ngadto sa publiko ang Davao City Social Welfare Development Office kon CSWDO nga ilang idangop ngadto sa kapulisan ang mga manaygon nga batan-on karong panahon sa Pasko aron nga ma-rescue ug malikayan ang ilang pagkatakod sa COVID-19.
Kini human gibutyag ni CSWDO Head Atty. Marlisa Gallo nga nag-anam-anam na og sugod sa pagpanaygon ang mga grupo sa mga bata sa mga panimalay ug sa kadalanan sa Dakbayan.
Aduna na silay nanga-rescue nga mga batan-on ug gi-assess na sab sa ilang social workers.
Nasayran usab sa buhatan nga kasagaran sa mga na-rescue, dili taga-Dakbayan sa Dabaw.
Dili usab angay nga hatagan sila og pinaskuhan o di kaha kwarta tungod kini nakalapas sa Presidential Decree 1563 kon Anti-Mendicancy Law.
Padayong naga-monitor ang CSWDO, Bantay Dagat, ug ang mga pulis sa mga utlanan sa Dakbayan sanglit dunay mga taho sab nga ginadala sa mga hamtong ang mga bata paingon sa Dakbayan aron manaygon.
Kamatikdan nga matag muabot ang –Ber months, kanus-a sugod sa Christmas season, mudagsang ang mga manaygon nga nanimuyo sa hilit nga bahin sa Dakbayan ug sa mga kasikbit niini nga lungsod ug dakbayan.
