Gipahayag sa beteranang showbiz columnist nga si Cristy Fermin nga siya nakapiyansa na kagahapong adlawa, sa korte alang sa kasong libel nga gisang-at batok kaniya ni Bea Alonzo, human magpagawas og warrant of arrest ang Quezon City RTC Branch 93.
Kauban ni Fermin nga nakapiyansa ang co-host sa iyang online show nga si Wendell Alvarez, samtang si Rommel Villamor gikatakda usab nga magpiyansa.
Gitakda sa korte ang kantidad sa piyansa nga P48,000 kada usa.
Sa usa ka pahayag, gibutyag ni Fermin nga wala sila nakadawat og opisyal nga pahibalo gikan sa korte.
Bisan pa man, ilang giuna og atiman ang pagpiyansa kagahapong adlawa.
Sa laing interbyu, gibalik ni Fermin ang iyang desisyon nga magpiyansa ug gibutyag niini nga kabahin na kuno sa iyang trabaho isip usa ka columnist ang mapasakahan og kasong libel.
Kahinumduman nga gisang-at ni Bea Alonzo ang reklamo niadtong Mayo 2024, tungod sa giingong sayop, malisyuso, ug makadaot nga mga pamahayag ni Fermin sa iyang online show.
