DAVAO CITY – Kaya pa nga i-accommodate sa mga crematorium sa dakbayan sa dabaw ang mga namatay gumikan sa covid 19.
Gikanayon ni Dr Michelle Schlosser, ang spokesperson sa Davao city Covid 19 task force nga sa karon wala pa gikinahanglan ang mass grave luyo sa padayong pagsaka sa kaso sa mga natakdan ug namatay gumikan sa covid 19.
Apan, nanghinaut usab si Schlosser nga dili na moabot pa sa ingon niini nga scenario ang syudad gumikan kay sakit alang sa mga health practioner nga sama kaniya nga mohimo ug dinaghan nga paglubong sa mga patay gumikan kay dili na kini ma-akomodar sa mga crematorium gumikan sa tumang kadaghan sa mga nahimong biktima sa makamatay nga kagaw sama sa nahitabo sa nasud India.
Kahinumduman nga gibutyag ni Mayor Inday Sara Duterte nga giandam na sa lokal nga kagamhanan ang mass grave nga naa nahimutang sa Tagakpan Public cemetery kung ugaling mograbe na gayud ang kaso sa covid 19 sa syudad.
Samtang gipasalig usab sa task force ngadto sa mga residente nga naa nagpuyo duol sa sementeryo nga mopatuman ang city health, DOH ug ang lokal nga kagamhanan ug mga pamaagi aron walay mahitabong kontaminasyon sa nahisgutang mass grave nga mamahimong maka-akomodar ug moabot sa 960 ka mga patay nga lawas.
