DAVAO CITY – Positibo karon ang ahensiya sa Davao City Covid-19 Task Force nga maangkon nila ang 100 porsyento nga vaccination sa kinatibuk-ang populasyon sa mga bata nga edad 5 hangtud 11 anyos dungan sa gikatakda nga pagsugod niini sa Pebrero 14, 2022 nga roll out niini.
Gikanayong anaa sa 260,000 ka mga bata ang target nga mabakunahan dinhi sa siyudad. Sumala pa kang Dr. Michelle Schlosser, tigpamaba sa Davao City Covid-19 Task Force, nga dinhi sa dakbayan anaa sa kinatibuk-ang 70-percent sa target population ang nabakunahan ug dako sumala pa ang tsansa nga maangkon ang 1.8 million sa higayon nga ilakip niini ang 260,000 ka mga bata.
Sumala sa Task Force target nila nga mabakunahan ang 260,191 ka mga bata nga edad singko hangtud 11 anyos sa nagsingabot nga lunes.
Kahinumduman nga sugdan ang pediatric vaccination sa siyudad sa pipila ka mga balay tambalanan nga gilangkuban sa Southern Philippines Medical Center, Davao Doctors Hospital, Davao Medical School Foundation, ug Seaman’s Hospital.
Sa kasamtangan, naka-ong-ong pa gihapon ang kumpirmasyon sa Metro Davao Medical Research Center ug Brokenshire Hospital. Samtang una na sab nga gibutyag ni Schlosser nga mahinungdanon nga ablihan ang vaccination nga alang lamang sa 5-11 anyos nga mga bata ug dili isagol sa 12 anyos pataas.
Laraw sumala pa niini nga ipatuman ang non-threatening ug kid-friendly environment ug aron malikayan sab nga masagol ang mga bakuna nga alang lamang sa mga bata nga lahi usab ang dose nga gigamit sa mga hamtong.
Bisan tuod nga ginatugutan ang walk-ins sa pediatric vaccination, apan mas mayao pa gihapon ang pre-registration ug himuon kini pinaagi sa Safe Davao QR o sa mga balay tambalanan nga mamahimong kabahin sa pagsugod sa roll out.
