DAVAO CITY – Nagpadala si Davao City Councilor Danilo Dayanghirang ug sulat sa Land Transportation Franchising and Regulatory Board (LTFRB) – Central Office aron nga ipasibaw ang iyang pagbabag sa pagsaka sa bayrunon sa taxi.
Gipasala ang maong sulat kang LTFRB chairperson, Lawyer Martin Delgra.
Mi-apela sab si Dayanghirang sa iyang sulat kalabot sa nahimong desisyon nga dungagan ang pletihan sa taxi nga mas maayong momugna ug win-win solution nga maka-benepisyo sa riding public.
Gipada-an sab ug kopya sa sulat sila si Davao City Mayor Sara Z. Duterte-Carpio, Presidential Complaint Center (PCC), ug Atty. Teresita Yñiguez, LTFRB-Davao regional director.
Una na matud pa nga gipasibaw ni Dayanghirang ngadto sa iyang mga kaubanan atol sa sesyon sa City Council ang iyang concern kalabot sa taxi rate increase apan wala napalabang ang iyang giduso nga resolusyon kalabot niini gumikan sa kawad-on ug quorum sa nahisgutan nga panahon.
Subay sa milabay nga report, gitataw ni Yñiguez nga walay kontrol ang rehiyon sa maong kamandoan.
Hinuon suportado sumala pa niya ang lakang sa City Council kalabot sa pagpahigayon ug public hearing kalabot sa taxi rates adjustment.
