DAVAO CITY- Nangayo og katin-awan gikan sa Police Regional Office (PRO) XI ang usa ka konsehal ning dakbayan kalabot sa “inconsistency” sa pagtuboy og director sa Davao City Police Office (DCPO).
Sumala pa ni Councilor Luna Acosta, dili makatarunganon ang maong panghitabo hilabi pa nga wala kini nihatag og katin-awan sa katawhan sa dakbayan.
Kahinumduman nga kniadtong Hulyo 8 gituboy si PCol. Lito Patay isip director sa DCPO apan atol sa iyang first command conference, nakadawat kini og tawag sa pag-relieve kaniya sulod lamang sa upta ka oras nga paglingkod.
Nipuli kay PCol. Patay si PCol. Sherwin Butil apan ayha paman kini makapadayon s apaglingkod, gipuihan na usab kini ni PCol. Hansel Marantan isip acting city director.
Sumala pa ni Acosta nga dili gayud malimod ang nahatag niining pagkalibog sa katawhan hilabi pa nga wala kini nihatag og written o verbal notice nga gihatag atol sa proseso sa pagpili og opisyal sa maong position.
Matud pa nga nga nakalapas kini sa rule of law sa pag-appoint og chief of police nga nakalatid sa Republic Act No. 6975 o ang Department of the Interior and Local Government Act of 1990 nga gi-ammend sa Republic Act No. 8551, or “Philippine National Police (PNP) Reform and Reorganization Act of 1998”.
Sumala pa nga ang RA 8551 ang naghatag og gahom sa mayor nga mopili og Chief of Police subay na usab sa girekomenda sa PNP Regional Director ug mas maayo nga gikan sa susamang probinsya.
Gikanayon ni Acosta nga si PCol. Patay maoy gipili sa mayor samtang anaa sa shortlist si PCol. Butil. Pagpaklaro sab sa opisyal nga si PCol. Marantan ang dili gikan sa Davao Region ug wala usba kini gipili sa mayor.
Ning kasamtangan, wala pa nipaguwa og pamahayag ang PRO XI kalabot niini.
