Giklaro ni incumbent Davao City Councilor Javi Campos III sa media ang mga isyung gikalambigitan niini kini human nga gitawag nga ‘traydor’ ni Konsehal Diosdado Mahipus ug gikwestiyon ang mikatag nga hulagway niini online kauban si Presidente Ferdinand Marcos, Cong. Sandro Marcos ug uban pang mga kaalyado sa kasamtangang administrasyon.
Apan, nasabtan matud pa ni Campos ang sentimyentong gipasibaw ni Mahipus atol sa privilege speech niini atol sa regular session niadtong adlawng Martes, Oktobre 1 ning tuiga sa Sangguniang Panlungsod ug sa uban pang mga kaubanan niining mga konsehal.
Kahinumdumang mipasibaw si Mahipus sa iyahang gibating kahiubos gumikan alang kaniya, dili maayong duna matud pay traydor sa ilang partido.
Sa pikas bahin, nahimong mapasalamaton si Campos sa katawhan.
Hinoon, nananghid matud pa kini sa pamilyang Duterte human sa pila katuig nga nagkauban sila sa pagpangalagad sa katawhan.
Gani, personal nga desisyon niini nga muhawa sa Hugpong sa Tawong Lungsod ug subling magpapili isip Congressman sa 2nd District ilawom sa Partido Demokratiko Pilipino.
Nananghid sab matud pa kini pag-ayo kang Davao City Mayor Sebastian ‘Baste’ Duterte.
Kahidumdumang giubanan ni Civil Service Commission Karlo Nograles si Campos sa pagduso niini sa iyang COC kagahapon sa COMELEC XI ug gikumpirma kagabie sa iyang kampo nga hingpit na kining miresign isip chairperson sa CSC, subay sa nahimong kumpirmasyon ni PCO Secretary Cesar Chavez.
