DAVAO CITY – Gisugdan na karon ang contact tracing sa mga nakahimamat sa mga pari ug seminarista sa St. Francis of Assissi Parish sa Maa ning dakbayan sa Davao human nga nagpositibo ang mga nahisgutan sa Covid-19.
Nasayran nga duruha ka semana nga ipailalom sa lockdown ang maong simbahan nga gisugdan kaniadtong Enero 2, 2021 kini aron nga mapugngan ang pagkatag sa kagaw.
Sumala pa kang Maa Brgy. Capt. Pacito Cañete Jr. nakiglambigit gilayon ang City Health Office (CHO) sa simbahan ingon man ang mga contact tracers diin anaa na sa walo ka mga indibidwal ang nasubay nga ulahing nakahimamat sa mga nagpositibo.
Sa kasamtangan, sirado una ang simbahan ug temporaryong walay misa nga gipahigayon. Karong adlawa laoman nga mahilakip sa pagahisgutan ang unang simbahan sa siyudad nga gipailalom sa lockdown sa ipahigayon nga press conference sa Task Force Covid-19.
Gikanayong si Brgy. Capt. Cañete nga padayon karon ang contact tracing ilabi na nga dili lamang mga personahe sa simbahan ang nakahimamat sa mga pari kung dili lakip na ang mga manimbahay.
