DAVAO CITY – Sugdan na sa Mati Incident Management Team ang contact tracing sa tanan nga mga pasyente sa Davao Oriental Provincial Medical Center nga nagpatambal kaniadtong Mayo 25 hangtud 26, 2020.
Kini human nga nagpositibo ang usa ka 32 anyos nga resident doctor for internal medicine sa nahisgutan nga balay tambalanan nga adunay duty hours usab sa usa ka dialysis facility dinhi sa dakbayan sa dabaw. On duty sab sumala pa sulod sa duruha ka sunod-sunod nga adlaw sukad May 25 hangtud 26 ang nahisgutan nga doktor diin nakahimamat niini ang daghanang mga kaubanan nga mga health personnel ug mga pasyente.
Gikanayon sab ni IMT commander Dr. Ben Hur Catbagan Jr. gihulat na lamang nila karon ang kompletong listahan sa mga close contacts sa nahisgutan nga doktor ilabi na ang mga na-discharge kaniadtong May 25 hangtud May 26, aron nga mapugngan ang pagkatag sa Covid-19 sa komunidad.
Sa kasamtangan napulo pa lamang sa sa pasyente sa ospital nga adunay close contacn sa nahisgutan nga infected health worker ang ilang na-trace.
Una ng mikatag sa social media sukad pa kaniadtong Sabado ang kalabot sa nahisgutang infected health worker, apan wala una nagpagula ug pahayag ang Provincial Inter-Agency Task Force.
