DAVAO CITY – Midangop sa Bombo Radyo Davao ang usa ka Jaime Gomez, usa ka construction worker nga nagtukod ug balay sa Camia St., Green Hills, Catalunan Pequiño, ning dakbayan sa Davao gumikan sa ilang nakobkoban nga mga tulo ka mga vintage bomb samtang nagkobkob ug septic tank sa gi-contruct nga balay.
Sumala pa kang Gomez nga gidulog-dulog na niya ug katulog ang nahisgutan nga vintage bomb ug nabalaka siya nga dakpon labi na nga anaa sa martial law ang dakbayan sa Davao sa pagkakaron.
Nabalaka sab siya gumikan kay ang duha niini nawala ug tingali ug nabaligya na sa junk shop.
Una nang gitataw sa Talomo Police Station nga dili layo ang posibilidad nga mobusikad pa ang nahisgutan nga bomba, labi na kung gabson o kaha tiltilon.
Gumikan niini hugtanon ang pahimangno sa mga tin ugyanan sa balaod nga gilayon nga makig-alayon sa mga tinugyanan sa balaod sa higayon nga makakobkob ug mga karaan nga mga bomba.
Ang nahisgutan nga mga bomba gituohan nga mao ang kalakip sa mga bomba nga gipanghulog atol sa ikaduhang panggubat apan wala makaboto human maigo sa humok nga bahin sa yuta.
