DAVAO CITY – Nagpadayag og sintemyento si Davao City 1st District Representative Paolo Duterte mahitungod sa kalambigitan sa pipila ka mga TUPAD beneficiaries nga nasakpang nanikas aron makakuha ug hinabang gikan sa Cash for Work program sa DOLE XI ug sa lokal nga panggamhanan sa dakbayan.
Matud pa ni Congressman Pulong, daghan mga tao ang wala makakuha sa benepisyo sa TUPAD tungod nga adunay pipila nga nakapahimulos sa maong programa sa makadaghan nga higayun gamit ang daghan nga pangalan kada usa ka tao.
Tungod sa maong pagpahigayon sa maong binuhatan taliwala sa giagiang krisis sa nasud, posibleng mapasakahan ug kasong kriminal ang mga nalambigit niini. Gipaningkamutan sa opisina ni Congressman Pulong uban ang DOLE nga makahimo ug mga lakang aron madakpan ang mga suspetsado.
Sa katapusan, gipadayag ni Pulong ang iyang panghinaot sa karma ug silot nga muabot kanila.
Kahinumdumang nag-viral ang usa ka video nga nagbulgar sa tulo ka mga Cash for Work volunteers nga nag-picture taking, nag-ilis ug sanina ug nagpaka-aron ingnon nga naglimpyo sa palibot subay sa gipabuhat kanila sa programa.
Gikumpirma na sa DOLE XI nga tanggal na sila sa listahan sa mga benepisyaryong makadawat sa ilang pay out human sa ilang pagpanarbaho sulod sa kinse ka adlaw.
via || Bombo LJ Florendo
