Giduso ni House Majority Leader Ferdinand Alexander “Sandro” Marcos sa Ilocos Norte ang hinanaling pag-abolish sa travel tax ug nagatuo nga tukma na kaayo karon nga tangtangon kini tungod kay nahimo na kining pabug-at sa mga Pilipinong biyahero ug sa pagbangon sa ekonomiya.
Gisumite ni Marcos ang House Bill No. 7443 nga nagtumong sa hingpit nga pagwagtang sa travel tax nga gipahamtang ilawom sa Presidential Decree No. 1183 ug sa Tourism Act of 2009.
Sumala ni Majority Leader Marcos, ang travel tax nga moabot og ₱2,700 alang sa first class ug ₱1,620 alang sa economy class usa ka dugang gasto nga nagbabag sa pagbiyahe sa mga Pilipino alang sa trabaho, pamilya, ug uban pang mga oportunidad.
Gibutyag niini nga dako kining pas-unon ilabi na sa mga pamilyang Pilipino, ug mas angay unta gamiton ang maong kantidad sa mga butang nga mas gikinahanglan ug sa pagpalihok sa lokal nga ekonomiya.
Gitumong usab ni Marcos nga kadaghanan sa mga nasod sa ASEAN mitangtang na sa susamang buhis aron mapalambo ang turismo ug negosyo, hinungdan nga mahabilin sa dehado nga kahimtang ang Pilipinas kung ipadayon kini.
Ilawom sa maong sugyot, ang pondo nga karon ginadawat sa mga ahensya nga nakabenepisyo sa travel tax sama sa TIEZA, CHED, ug NCCA, ilakip na lamang sa General Appropriations Act.
Matod pa ni Marcos, dili pribilehiyo ang pagbiyahe alang sa daghang Pilipino kondili kabahin kini sa ilang panginabuhian ug pagpakig-uban sa pamilya, busa ang pagpaubos sa gasto sa biyahe makatabang sa turismo ug sa mga industriya nga nagsalig niini.
