DAVAO CITY – Nangayo na og pasaylo si Davao City 1st District Representative ug House Deputy Speaker Paolo “Pulong” Duterte human nga misingit sa linya ug wala misunod sa screening requirement ang iyang anak nga si Omar Duterte sa usa ka grocery sa Davao City luyo sa hulga sa Coronavirus Disease 2019 (COVID-19).
“It has come to my attention that my son, Omar Duterte, went to SNR Davao and he did not line up and thus, was not subjected to stringent screening requirements of the establishment,” pamahayag sa presidential son.
Gisiguro usab niini nga dili niya palabyon ang binuhatan nga gipakita sa iyang anak.
Kini labi na nga pipila ka oras ang paaboton sa linya pa lamang una makasulod ang usa ka indibidwal sa sulod sa grocery gumikan sa gipatuman nga social distancing kung asa limitado lamang ang ihap sa mga taong pasudlon sa sulod sa usa ka establisiyemento.
Gawas niini, hugot usab nga gipatuman ang body temperature checking sa mga mamalitay una pa man sila tugotan nga makasulod ug makapalit sa grocery.
“This incident is unfortunate, given the health emergency that we are facing these days, when most of us are preoccupied with efforts to protect every Dabawenyo, especially our frontliners and government responders and volunteers,” dugang pa ni Duterte.
Samtang, paimbestigahan na usab sa kongresista ang sumala pa pagpasagad sa security team nga nakauban sa iyang anak niadtong tungora.
