DAVAO CITY – Hugtanong gibulgar ni kanhi House Speaker Pantaleon Alvarez ang mga panghitabo nga may kalabutan sa gipagula nga Preventive Suspension Order batok kang Davao del Norte Governor Edwin Jubahib.
Sumala pa sa kongresista, dunay duha ka mercenaries nga gipadala ang Special Assistant to the President Antonio Lagdameo Jr. nga mihangyo ngadto sa gobernador nga dili ipadayon ang ipahigayog prayer rally sa Hakbang ng Maisuig karong Abril 14 sa Davao del Norte.
Nasayran nga naghangyo si Lagdameo nga ipahunong ang pagpahigayon sa programa gumikan maulawan sila Tagum City Mayor Rey Uy ug ang Vice Governor ug karong acting governor nga si Oyo Uy nga suportado matud pa ni House Speaker Martin Romualdez niadtong milabayng presidential election.
Dugang pa ni Alvarez, ang wala pagtahud sa ikaduhang imbitasyon nila Lagdameo ngadto kang Jubahib ang gipasangil nga rason nganong naisyuhan og suspension order ang gobernador kagahapon sa DILG.
Gikaangal sab sa kongresista ang sumala pa pagpanumpa ni Vice Governor Uy isip acting governor una pa man ang pagsususpinde kaniya. Nasayran sab nga dunay commitment ang matag mayor sa mga lungsod ug munisipalidad sa probinsya nga manghakot ug magpadala og katawhan nga ipasalmot sa prayer rally karong adlawng Dominggo.
Gibarugan sab ni Jubahib nga ipahigayon ang prayer rally sa probinsya sa nahisgutang adlaw.
Sa gipagawas nga video message gabii, Abril 11, gisegundahan sab ni Jubahin ang mga pamahayag ni Alvarez mahitungod sa iyang duha ka bulan nga suspension diin usa sa nakita niini nga rason ang ang sakyanan nga na-issue ngadto kang Board Member Orly Amit nga gi-recall sa gobernador niadtong Nobyembre 2022.
Gikadismaya sab kini sa suspendidong gobernador nganong mas nahatagan pa og pagtagad ang maong isyu kung itandi sa “Ayuda Scam” sa Davao del Norte nga iyang gisang-at ug gipapaimbestiga sa sa Senado.
Sumala pa ni Jubahib, usa kini ka matang sa power tripping alang kadtong dunay interes sa pwesto sa panggamhanan.
Gibarugan ni kanhi Pangulong Rodrigo Duterte nga walay katungod nga pahawaon lang basta-basta ang mga lideres nga gibotar sa katawhan sa probinsya sa Davao del Norte.
via || Bombo LJF
