DAVAO CITY – Daghan gayud ang nadismaya sa natigayon nga konsyerto ni Ely Buendia, legendary frontman sa Eraserheads nga gipahigayon sa Davao Crocodile Park Grounds, ning dakbayan sa Davao.
Sumala pa kang Davao City Councilor Al Ryan Alejandre, nga dili libre ang nahisgutan nga konsyerto ug daghan gayud ang naglaum sa high performance sa singer, apan pakyas.
Ang gikapungot sa mga taga-Davao mao ang gihimong rason ni Ely nga nawad-an siya ug tingog gumikan sa nagsunod-sunod nga gig niini.
Gawas sa kanhi legendary frontman sa Eraserheads, kalakip sab sa konsyerto ang perennial crowd drawers Parokya ni Edgar ug ang Hale.
Gumikan kay una nga nasaksihan ang unang duha ka mga banda taas na ang emosyon sa mga fans.
Pag-abot sa main event dugay nga nakasulod si Ely nga tan-aw sa uban daw nadisbentaha-an sila sa nahisgutan nga konsyerto.
Disappointed ang mga misaksi sa konsyerto gumikan kay daw gibalewala ni Ely Buendia ang mga fans sa Davao, ug daw nagkulang sa gihimong preparasyon human nga labihang pagawa gumikan sa naghinobra nga gig.
