DAVAO CITY – Gipasalig ni Davao City Mayor Inday Sara Duterte-Carpio nga palig-onon pa karon sa lokal nga kagamhanan ang mga lakang sama sa community surveillance aron mga mapaubos ang kaso sa Covid-19 sa dakbayan.
Tipik lamang gihapon ang maong lakang human nga giwagtang na karon sa dakbayan ang paggamit ug Rapid Diagnostic Test o RDT alang sa mga indibiduwal nga moabot sa siyudad ingon man pagbalik karon sa commercial flights.
Gitataw sab sa Mayor nga nagpadala na sila ug sulat sa national government ingon man sa Department of Transportation (DOTr) alang sa planong pagpahigayon ug health screening sa mga pasahero nga mosulod sa siyudad ug gisugyot ang susama nga proseso sa uban pa nga tugpahanan.
Una ng gibutyag sa Mayor nga dili sulit ang investments sa lungsod sa paggamit ug RDT sanglit dyutay lamang ang matala nga positibo.
Sa kasamtangan, gisalig na lamang sa district health offices ang maong lakang ug ang ipakita na lamang nga health certificate sa flight passengers ang basehan aron masubay kung wala kini natakdan sa Covid-19.
