Nagpahimangno ang Commission on Elections (Comelec) sa mga kandidato ug ilang mga supporters nga ibutang ang mga campaign materials ngadto lamang sa mga gi-desisyunan nga common poster areas.
Kini human sa pagkolekta sa kapin 9,000 ka campaign materials nga nakita sa buhatan nga wala nahisubay sa sakto nga lugar sa Region XI.
Gibutyag sa buhatan nga gikan Enero 20, 2025, ang Comelec nakakolekta na og 9,646 ka campaign materials sa rehiyon diin gilangkoban kini og 3,178 alang sa party-list ug 6,468 alang sa senatorial campaigns.
Gikompirma ni Atty. Gay Enumerables, ang Comelec Assistant Regional Director, nga ang mga materyales anaa na sa kustodiya sa mga election officers.
Kahinumdoman kaniadtong Pebrero 11, gisugdan ang “Operation Baklas” diin ang mga opisyales sa Comelec gikataho nga daghan sa mga campaign posters nga milapas sa 2×3 feet nga gidak-on nga gitagana sa Comelec Resolution No. 11086, nga gipagawas kaniadtong Disyembre 9, 2024, diin naglimitar sa mga pamphlets ug uban pang materyales nga dili molapas sa gitagana nga sukod nga 8 ½ by 14 nga pulgada.
Ang mga kandidato ug political parties gihatagan lamang og 72 ka oras aron tangtangon ang mga campaign materials nga nahimutang sa wala gi-desisyunan nga mga lugar ug kung magpabilin pa ang mga materyales niini, mag-isyu na ang Comelec og show-cause order.
Ang Comelec usab nagpasidaan nga maghatag kini og legal nga aksyon alang sa mga campaign materials nga gibutang sa mga kahoy, eskwelahan, mga government buildings, ug uban pang restricted nga mga lugar, diin nahisubay kini ubos sa Republic Act No. 3571.
Dugang pa sa buhatan, nga adunay usa pa ka nationwide nga “Operation Baklas” ang ipahigayon sa Marso 28, 2025, alang sa pagsugod sa campaign period alang sa mga lokal nga kandidato.
