DAVAO CITY – Walay natalang nakalapas sa Election Gun Ban kagahapon sa Dakbayan sa Davao atol sa unang adlaw nga pagpatuman niini. Kini mismo ang gibutyag sa hepe sa Davao City Police Office nga si Police Colonel Kirby John Kraft.
Gisugdan sa DCPO ang pagmonitor sa mga posibleng violator sa gun ban alas 12:01 sa kaadlawon kagahapon, subay sa COMELEC Resolution 10728, nga mulungtad hangtod Hunyo 8 karong tuiga.
Subay sa nasangpit nga resolusyon, suspendido ang tanang Permit to Carry Firearms Outside of Residence sa mga sibiliyan.
Gisuspinde usab ang pagbiyahe sa mag armas, bala, explosibo, ang pagdisplay ug exhibits sa mga armas, ug ang employment sa mga security personnel alang sa mga VIP.
Exempted sa maong ban ang pwersa sa kapulisan ug kasundaluhan, ug kadtong mga nakakuha og license ug approval gikan sa COMELEC tungod sa security concerns sama sa pagpanghulga sa kinabuhi, ilabi na nga dunay higayon nga muabot sa pinatyanay ang init nga bangi sa politika matag bugnong lugaynon.
