DAVAO CITY – Nangandam na ang ahensiya sa Commission on Elections (COMELEC) sa pagpadayon sa Voter’s Registration karong Enero 20, 2020 hinungdan nga gi-awhag karon sa komisyon ang mga botante nga dili na hulaton pa ang deadline sa Setyembre 30, 2020.
Sumala pa kang Atty. Krisna Caballero, tigpamaba sa Comelec 11, nga gawas sa mga buot magparehistro, andam sab sila nga mo-assist sa mga botante nga buot mo-transfer og lugar.
Gitataw sab sa nahisgutan nga ubay-ubay na sab sa mga botante sa Davao region ang na-deactivate hinungdan nga kung buot sa mga nahisgutan nga subling makaboto, mamahimo lamang nga mag-reactivate pinaagi sa pagbisita sa ilang buhatan.
Nasayran nga i-deactivate ang usa ka botante sa higayon nga duruha ka sunod-sunod nga eleksiyon na kini nga dili makaboto.
Gitambagan na lamang sa nahisgutan ang mga buot magpa-rehistro ilabi na kadtong unang higayon pa lamang nga magdala og government issued ID samtang school ID sab sa mga estudyante.
Dili sumala pa puwede ang cedula o Police Clearance.
Sa mga buot magpa-correct sama na lamang kadtong mga bag-o pa lamang nga nag-minyo, magpadala lamang og pamatuod sama sa marriage certificate.
