DAVAP CITY – Gumikan kay nagkaduol na sab ang eleksiyon sa bulan sa Mayo ug dili kalikayan ang adunay mga politiko nga nagasuroy na sa nagkadaiyang lugar sa Pilipinas, nanawagan ang Commission on Election 11 (Comelec 11) sa tanan sakop sa mga media ilabi na dinhi sa Davao region nga gilayong makiglambigit sa ilang buhatan partikular na kadtong mga kandidato nga nagsugod na sa ilang campaign advertisements o materials sa nagkadaiyang media platforms ingon man sa digital news.
Una ng gibutyag ni Comelec 11 assistant regional director Atty. Gay Enumerables, nga kalakip sa gimando karon sa ilang buhatan mao ang pag-obliga sa mga news agencies nga mosumite ug mga pangalan sa politiko arun nga matutukan nila ang mga gigasto niini ingon man ang oras sa pag-ere.
Gani mamahimog sumala pa nga mapahamtang ug silot ang mga dili mutamod sa nahisgutan nga regulasyon sa Comelec.
Sayud na matud pa ang tanan nga mga news agencies sa mga polisiya kalabot sa pagpagawas ug campaign advertisements hinungdan nga angayan lamang kini nga mapatuman.
Gilayon sab nga gihatagan niini ug katin-awan nga ang nahisgutan nga kamandoan ipatuman lamang atol sa pagsugod sa campaign period.
Kahinumduman nga kamatikdan karon ang daghanan na nga mga aktibidad sa mga politiko nga makita sa telebisyon ug social media apan dili sumala pa kini makonsidera nga early campaign.
