Nadawat na sa Commission on Elections (Comelec) ang source code alang sa overseas voting sa umaabot nga 2025 midterm elections.
Ang international partner firm nga Pro V&V Inc. maoy nagmugna sa trusted build niadtong Sabado ug opisyal nga giturn-over kini sa Comelec niadtong Lunes.
Gipahibalo ni Pro V&V president Jack Cobb nga magpahigayon sila og dugang nga testing sa Miyerkules aron masiguro nga hapsay ug epektibo ang sistema.
Samtang ginahulat pa ang certification gikan sa Technical Evaluation Committee (TEC), gipasabot ni Cobb nga kinahanglan pa og daghang papeles ug gilauman nga ma-issue kini sa ikaduhang semana sa Abril.
Gikumpirma usab ni Comelec Chairman George Garcia nga nagpaabot na lang sila sa Bangko Sentral ng Pilipinas (BSP) alang sa pagdeposito sa source code sa overseas voting.
Gipasalig usab niini nga wala’y balaod nga nalapas ug padayon ang ilang pagsiguro nga luwas ug kasaligan ang eleksyon sa 2025.
