Nakadawat og kasayuran ang Commission on Elections (COMELEC) kabahin sa Facebook post nga nag-ingon nga ang tanang mga file nga may kalabutan sa Mayo 12, 2025 National ug Local Elections gi-delete, sa mga file sa datos sa National Printing Office (NPO) niadtong Mayo 30, 2025.
Apan, bisan pa man og maayo nga gipasabot ang mga proseso nga kinahanglang ipatuman sa COMELEC subay sa kasamtangang mga balaod ug regulasyon aron mapadayon ang seguridad sa bag-o pa lang nga piniliay, pakyas gihapon ang hingpit pagpasabot sa kanhi opisyal niini.
Busa, ligdong gihimakak sa COMELEC nga ilang gipapas ang tanang datos ug files nga may kalabotan sa 2025 NLE.
Gitagaan kini og katin-awan sa maong buhatan nga gitangtang lamang niini ang mga sof copies sa mga ballot faces, accountable forms, and voter information sheets (VIS) gikan sa National Printing Ofiice (NPO) data servers niadtong Hunyo 17, 2025, isip kabahin sa regular nga post-election procedures, ug pagsunod sa Data Privacy Act.
Subay niini, ang Commission on Elections naglaum sa tanan, ilabina sa mga politiko ug kandidato, nga mahimong tigpasiugda sa katungod sa matag Pilipinong lungsoranon sa saktong impormasyon ug dili mahimong instrumento sa sayop nga impormasyon/disinformation sa atong nasud.
