Nagpadayon karon sa pagtinabangay ang city government ug Davao City Water District kon DCWD pinaagi sa gihimong awareness forums kabahin sa Septage Management Program sa 81 ka barangay sa dakbayan sa Davao. Kini human nga gipadayag sa Davao City Health Office (CHO) nga kadaghanan sa mga residente nga nagpuyo sa mga coastal communities sa syudad sa Davao wala’y septic tank, ug ang ilahang hugaw nga basura (human waste) kasagaran diretso ilabay sa kanal o sewerage system.
Sumala pa ni CHO Sanitation Inspector III Noli Jimeno nga iyahang giawhag ang mga residente ilabi na kadtong nagpuyo sa mga coastal areas, nga magbutang og septic tank sa ilahang panimalay aron malikayan ang pagkakontamina sa tubig dagat sa mga bacteria sama sa E. coli ug Enterococci nga delikado sa kahimsog sa panglawas.
Samtang nangayo usab kini og tabang sa mga barangay sa pagmonitor sa waste management practices sulod sa coastal communities. Sumala pa sa opisyal nga aron masulbad kini nga problema, nakigtambayayong ang city government sa Davao sa Davao City Water District (DCWD) alang sa pagpahigayon sa Septage Management Program (SMP).
Ang tumong sa maong inisyatibo mao ang pagpakunhod sa lebel sa fecal coliform sa mga tinubdan sa tubig sa siyudad ug paghatag og mas luwas nga paagi sa pagdumala sa septage, alang sa proteksyon sa kahimsog sa publiko ug kalikupan. Niadtong miaging bulan, usa ka forum ang gihimo sa Brgy. Daliao sa Toril aron mapalapad ang kahibalo kabahin sa Davao City Septage Management Program. Ang panaghisgot nagpunting sa mga probisyon sa Septage and Sewerage Management Ordinance sa syudad, nga nagkinahanglan nga ang mga panimalay adunay sanitary tank nga mosunod sa three-chamber standard ug regular nga ipa-discharge o ipa-desludge.
Atol sa forum, gipaila sa DCWD ang umaabot nga Sanitation Service, nga magtabang sa pagpahimulos sa ordinansa. Sa dihang magsugod na kini nga serbisyo, ang unang government-owned Septage Treatment Plant sa syudad maghatag og kombinyente, kasaligan, ug regular nga pag-desludge sa mga hugaw gikan sa mga panimalay ug establisimento. Ang makolektang basura pagkahuman sa treatment ang iproseso sa sakto nga paagi.
