Gipahibalo sa San Antonio Spurs ang pagkanaug sa pwesto sa ilahang beteranong coach nga si Gregg Popovich. Matod pa sa team, ang 76 anyos nga coach ang mamahimong president of basketball operations sa team. Subay niini, gipahibalo usab sa Spurs ang bag-ong coach nila nga si Mitch Johnson.
Gipahayag ni Popovich nga bisan sobra ang pagmahal niini sa dula, nakahukom kini nga mukanaug sa pwesto. Kahinumduman nga kaniadtong Nobyembre sa nakalabay nga tuig, nakasinati ang nahisgutan ug mild stroke ug wala na mibalik sa mga dula sa Spurs. Gipasalamatan niini ang mga players, opisyal ug mga fans sa Spurs gumikan sa walay hunong nga suporta.
Si Popovich ang 3-time NBA Coach of the Year ug gipangunahan ang Spurs sa lima ka championships ug siya usab ang nahimong coach sa USA Basketball aron makuha ang bulawang medalya sa 2020 Tokyo Olympics. Gideklara usab kini nga Basketball Hall of Fame isip coach kaniadtong 2023. Tuig 1988, nahimong unang assistant coach sa Spurs si Popovich sulod sa upat ka season apan mibalhin isip assistant coach sa Golden State Warriors ug duha ka season.
Kaniadtong 1994, mibalik si Popovich sa Spurs isip general manager ug vice president of basketball operations. Paghi-abot sa tuig 1996-97, gipulihan niini si Bob Hill aron mahimong head coach kung diin gikunsedera kaniadto nga pinakamalampuson nga team ang Spurs sa NBA.
