Nag-viral karon sa social media ang video ni kanhi Laguna 1st District Congressman Dan Fernandez nga adunay caption nga “Makakilos na nga, maghanap muna ako trabaho today,” apan lahi nga detalye ang mas nabantayan sa publiko diin makita nga anaa siya sulod sa iyang closet.
Apan imbes ang sinul-otan ni Dan ang matutukan sa mga netizen, ang ilang nabantayan mao ang daw kapariha nga closet sa actress ug model nga si Ivana Alawi.
Dali kining nakakuha og dakong atensyon online, ilabi pa nga bag-ohay lamang nahimong trending si Ivana tungod sa isyu nga may kalabutan sa sumala pa relasyon nila ni Bacolod Representative Albee Benitez.
Gilambigit usab ang ngalan ni Ivana sa VAWC complaint sa asawa ni Albee, nga gipasanginlan nga adunay “illicit affair” ang aktres ug ang kongresista.
Nakita sa mga netizen nga halos pareho ang hitsura sa closet ni Dan ug ni Ivana parehas white ug gold nga kolor nga tema, ug ang disenyo nga halos magkapareho, lakip na ang mga title sa drawers nga white nga adunay touch of gray vibes.
Kauban sa viral nga isyu, gibanhaw usab sa mga netizen ang karaang chismis niadtong 2020 nga nagkonekta kang Ivana ug Dan Fernandez.
Kahinumduman nga niadtong panahona, mikatag ang mga litrato nga kuno magkauban sila, apan sa usa ka interview ni Ivana kang Boy Abunda, iyang gisalikway ang maong isyu.
“No, we’re friends,” tubag ni Ivana sa pangutana kung ginapanguyaban ba siya ni Dan.
Matod niya, naggawas-gawas ra sila isip mga higala, apan walay romantikong kalambigitan. Dugang pa niya, “babaero” daw si Dan ug dili niya tipo ang klase sa lalaki nga ingon ana. Dili usab “cute” kaniya ang pagka-babaero niini.
Samtang, wala pay pamahayag ang aktres nga si Ivana kabahin sa mga isyung nagkatag online.
Paningkamotan pa sa Bombo Radyo Philippines nga kuhaan og pahayag si Dan Fernandez, apan hangtod karon wala pa kini mitubag sa nag-viral nga video.
