DAVAO CITY – Hingpit na nga gitapos kagahapong adlawa ang ika-walo ka tuig nga pagpatuman sa DA-DILG Joint Administrative Order (JAO) No. 02, series of 2014 o ang closed fishing season sa Davao Gulf.
Kahinumduman nga sagad kini nga ginapahigayon matag Hunyo 1 hangtud Agosto 31 isip lamang sa ahensiya aron nga mahatagan ug kahigayon ang mga isda nga makapangitlog ingon man dili mahilakip pagkuha ang mga gagmay nga isda.
Pinaagi sa pagpatuman sa nahisgutan nga lakang, masiguro sab ang ka-abunda sa mga isda sa maong area sa rehiyon.
Sumala pa kang Regional Director Raul C. Millana, ang closed fishing season mamahimong mapahimuslan sa umaabot pa nga henerasyon isip pamaagi alang sa environmentally sustainable measures aron nga magbaton igong tinubdan sa pagkaon ang katawhan.
Mapasalamaton sab ang ahensiya sa ilang nahimong ka-partner nga gilangkuban sa local government, private sector, ug mga stakeholders.
Ang maong lakang kabahin sab sa ilang nagpadayon kampanya batok Illegal, Unreported, ug Unregulated Fishing (IUUF), pagpadayon sa full patrol operations bisan pa man nga gitapos na ang closed season ug daghanan pa.
