Gidasig karon sa City Health Office sa Island Garden City of Samal (IGACOS) ang tanang residente nga mubisita sa pinakaduol nga Rural Health Unit aron nga masusi nga masuta ang ilang kondisyon ug malikayang mataptan og Human Immunodeficiency Virus (HIV).
Subay sa datos sa maong ahensiya ug kompirmasyon sab sa Department of Health-Regional Epidemiology Surveillance Unit (Resu), nakatala matud pa sila og 103 ka mga kaso sa HIV gikan tuig 1993 hangtod na sa Hunyo 2024.
Gani, subling nag-abiso ang DOH ngadto sa publiko nga kanunay matud pa nga musunod sa ABCDE kon “abstinence from sex; B is being faithful to their partner; C is consistently using condoms; D is not sharing needles; and E is to educate themselves” aron maprotektahan ang kaugalingon.
Ning tuiga, miabot na sa 215,000 ka mga People Living with Human Immunodeficiency Virus (PLHIV) sa nasud ang nataptan. Samtang, anaa sa 129,767 PLHIV ang natala gikan Enero 1984 hangtud Disyembre 2023.
Subay sa World Health Organization (WHO), ang HIV usa ka matang sa kagaw nga muatake sa immune system sa lawas.
Samtang ang AIDS makuha sa tawo sa higayong ang HIV musantop sa “most advanced stage” nga klase sa impeksiyon.
Gani, mukatag sa lawas ang HIV/AIDS pinaagi sa “bodily fluids” gikan sa tawong dunay sakit paingon ngadto sa dugo, semen, dughan, breast milk ug vaginal fluids, apan pagpaklaro sa ahensiya nga dili kini mukatag pinaagi sa paggakos, halok, o pagsalo og pagkaon.
Sigon sa WHO nga ang HIV/AIDS nagpabilin nga usa sa pinakadako nga public health issues sa tibuok kalibutan ug mikalas na og kapin 42.3-M nga kinabuhi hangtod ning tuiga ug human matud pa sa 2023, gibana-banaan sa WHO nga 39.9 milyon na ka mga tawo ang magpuyong dunay HIV.
