DAVAO CITY – Nagbahad ang Davao City Health Office ngadto sa katawhan nga dili balewalaon ang mga risgo nga hatud sa nagpahinabong init nga panahon, lakip niini ang heat stroke.
Gikanayon ni Dr. Julinda Acosta, CHO technical division head, ang ilabihang pag-expose sa lawas sa kainit ang tinubdan sa maong balatian nga posibleng makaapekto sa pamanit, utok ug vital organs.
Gipunting sab sa espesyalista ang mga warning signs sa heat exhaustion sama na lamang sa pag-init ug pagpamula sa panit, pagkahilo, pagkahuyang, pagpanakit sa ulo, ug ang taas nga temperatura ngadto sa 41 degrees Celsius.
Dugang pa nga posible sab nga masinatian ang heat stroke sa sulod sa panimalay o sakyanan nga dunay sayop nga bentilasyon o agianan sa hangin.
Tambag karon sa buhatan nga muinom og daghang tubig ug limitahan ang oras sa pagpasing-init aron malikayan ang heat stroke.
Gikatala sa PAGASA – Davao ang pinakataas nga heat index sa dakbayan kaniadtong Abril 10 nga niabot sa 36 degrees Celsius.
Posibleng musaka sab ngadto sa 37 degrees Celsius an masinatiang init factor dinhi sa Davao City sa musunod nga lima ka adlaw.
via || Bombo LJF
