DAVAO CITY – Gibarugan sa mga opisyal sa Davao City government nga wala gipasagdan ang mga atleta ug delegado sa Palarong Pambansa 2019 nga gipahigayon dinhi sa siyudad.
Una niini, gisaway ang mga city officials tungod sa matud pa kawad-on ug medical personnel sa ground.
Sa usa ka media conference, hugtanon gipamahayag ni Department of Education (DepEd)-11 spokesperson Jenielito Atillo nga walay kamatuoran ang nahisgutan nga akusasyon ug wala kini nasayod kung asa kini naggikan.
Pagtin-aw pa ni Atillo, duruha ka higayon na nga gipahigayon sa dakbayan ang Davao Regional Athletics Association (DavRAA) Meet ug nakita nila nga wala nagkulang ang lokal nga panggamhanan sa paghatag ug serbisyong medical sa mga atleta.
Gani, sa mismong ground na natuloy ang mga medical personnel aron makaresponde gilayon ang mga nahisgutan kung gikinahanglan.
Sa bahin sab ni Davao City Health Office Head Dr. Josephine Villafuerte, adunay naghulat nga medical team sa matag billeting quarters ug kumpleto sab sumala pa ang ilang mga personahe sa mga playing venues.
Gitataw sab ni Emmanuel Jaldon sa Davao City Disaster Risk Reduction and Management Office, nag-una sa ilang mga ginahatagan ug pagtagad ang mga playing areas diin naka-preposition ang ilang mga sakop.
