Misarado pag-usab ang Citygate Mall sa Milan, Buhangin sugod Enero 10, isip bahin sa mga lakang aron masiguro ang kahimsog ug kaluwasan sa publiko human sa miaging insidente sa sunog.
Sa pahibalo sa administrasyon sa mall, ang pagsira walay klarong petsa sa pagbalik sa operasyon, ug magpadayon kini hangtod makompleto ang tanang kinahanglanong inspeksyon ug paglimpyo sa sulod sa pasilidad. Nangayo og pasaylo ang manejment sa kalit nga desisyon ug sa kakulian nga mapahamtang niini sa mga suki, tindahan, ug empleyado.
Sumala sa pipila ka mall-goers, nagpabilin pa ang baho sa sunog sa pipila ka bahin sa bilding, ilabi na sa mga dapit nga duol sa naapektuhang lebel. Mao kini ang usa sa mga rason ngano nga gihatagan ug prayoridad ang general cleaning, air quality assessment, ug structural checking sa tibuok establisemento.
Matod pa sa mga otoridad, importante nga masuta pag-ayo ang kahimtangan sa mall aron malikayan ang posibleng risgo sa kahimsog sa mga bisita ug trabahante. Apil sa ginahulat ang clearance gikan sa mga inspektor sa kalayo ug building safety bago tugutan ang pagbalik sa normal nga operasyon.
Kahinumduman nga niaging Enero 2 sa hapon, usa ka sunog ang mitumaw sa ikatulong andana sa maong mall, nga nag-aghat sa temporaryong pagsira ug evacuation. Sa karon, naglaum ang publiko nga matapos dayon ang rehabilitasyon aron mobalik ang usa sa mga dinagkong sentro sa pamalitanan sa Buhangin.
