Nagdumala ang Davao City Civil Registrar’s Office (CCRO) og enhancement training sa civil registration alang sa ilang staff, hospital ug funeral parlor clerks, isip pag-selebrar sa 35th Civil Registration Month.
Gipahigayon ang maong kalihukan sa Sanggunian Panlungsod, ug ang tumong niini mao ang paghatag og kaalamanan sa mga frontline staff bahin sa mga updates ug key components sa civil registration.
Gipasabaot ni Shirley Arendain, Registration Officer IV sa CCRO, nga importante nga ma-update ang mga staff sa mga kausaban sa proseso sa civil registration, ilabi na sa pag-andam sa mga dokumento susama sa birth certificate.
Mokapin 60 ka mga partisipante ang misalmot sa sesyon, nga kabahin usab sa padayon nga information education program sa Local Registrar’s Office aron mapaayo ang kahibaloan sa mga staff ug mapalambo ang kahusayan sa sistema sa civil registration.
Gawas pa niini, ang CCRO maghimo usab og Mall Tour sa Ecoland gikan Lunes hangtod Domingo, diin magtukod kini og station aron motubag sa mga pangutana bahin sa birth registration, marriage registration, ug uban pang civil registration services.
Alang sa mga pangutana o dugang impormasyon, ang mga Dabawenyos mamahimo nga mutawag o mag email sa buhatan ug mamahimo usab nga moadto sa Civil Registration Office nga anaa sa Ground Floor sa Sanggunian Panlungsod.
