Malampuson nga nahuman sa lokal nga panggamhanan sa Davao, pinaagi sa City Agriculturist Office (CAgrO), ang ikaduhang Solar-Powered Irrigation System (SPIS) sa Barangay Malabog, Paquibato District nga pinondohan sa City Disaster Risk Reduction and Management Office (CDRRMO).
Sumala pa ni CAgrO Officer-in-Charge Antonio Obsioma, ang bag-ong SPIS nagtumong sa paghatag og barato ug eco-friendly nga tubig-irigasyon alang sa mga high-value crops susama sa mga gulay ug kakaw, ilabi na sa mga lugar nga kulang og suplay sa kuryente.
Sumala pa sa opisyal, nga sa pagka karun aduna na’y duha ka SPIS sa Paquibato District diin ang una nga gitukod ang nahimutang sa Barangay Pañalum.
Gipasiugda ni Obsioma nga makatabang ang sistema sa pagbatok sa mga hagit nga dala sa El Niño pinaagi sa paghatag og lig-on ug padayon nga suplay sa tubig.
Ang Patag Farmers Association sa Malabog mao’y usa sa mga benepersaryo sa maong proyekto diin mao usab kini ang nagdumala sa maong solar-powered pump, nga mamahimo na usab magamit sa mga silingan nga mag-uuma.
Ang maong sistema ginalauman nga magsugod ang operasyon sa ikaduhang semana sa Marso.
