Nanawagan ang advocacy group nga CitizenWatch Philippines sa gobyerno nga pormal nga ilhon ang internet access isip ikalimang utility sa nasud, kauban sa kuryente, tubig, gas, ug transportasyon.
Sumala kang Atty. Kit Belmonte, dili na opsyon ang internet karon tungod kay nagdepende na niini ang adlaw-adlaw nga kinabuhi sa mga Pilipino.
Gibase usab sa grupo ang ilang panawagan sa datos gikan sa Department of Information and Communications Technology ug International Telecommunication Union.
Gipakita sa datos nga mas nahimong barato ang mobile data sa nasud, samtang mikusog ang fixed broadband gikan sa single-digit Mbps niadtong 2016 ngadto sa kapin 90 Mbps karong 2025.
Napanalipdan usab ang presyo sa entry-level fiber plans tali sa P1,299 hangtod P1,699. Bisan paman niini, gibutyag sa grupo nga nag-atubang gihapon ang mga telco companies og structural cost pressures sama sa taas nga presyo sa kuryente ug hinay nga proseso sa pagkuha og permit.
Tungod sa padayon nga tensyon sa Middle East nga nakaapekto sa presyo sa lana, gibutyag ni Belmonte nga ang lig-on nga koneksyon makatabang sa pagminus sa panginahanglan sa pagbiyahe ug makahatag og dako nga pagdaginot sa publiko.
