Nabungkag sa mga awtoridad ang giingong ilegal nga operasyon sa pagmina sa Barangay Araibo, Pantukan, Davao de Oro human madakpan ang 30 ka mga indibidwal atol sa joint anti-illegal mining operation niadtong Hulyo 7, 2026. Narekober usab sa operasyon ang 128 ka sako sa gidudahang gold ore, mga kagamitan sa ilegal nga pagmina, usa ka Isuzu ELF truck, ug mga armas nga adunay kinatibuk-ang kantidad nga gibanabanaang mokabat sa ₱5.54 milyon.
Nadakpan pa gayod ang tulo ka dugang nga mga suspek sa follow-up operation, diin narekober usab ang tulo ka armas ug mga bala. Gikustodiya karon sa CIDG Davao de Oro ang tanang mga nadakpan, samtang gitugyan sa Mines and Geosciences Bureau (MGB) Region XI ang mga narekober nga mineral ores ug kagamitan alang sa angay nga disposisyon ug dugang imbestigasyon.
