Gitudlo ni Presidente Bongbong Marcos Jr. si Police Major General Nicolas Torre III isip sunod nga hepe sa Philippine National Police (PNP), sumala sa pagpahibalo ni Executive Secretary Lucas Bersamin karong hapon. Pulihan ni Torre si Police General Rommel Marbil nga mahuman ang termino sa Hunyo 7.
Sa pagkakaron, si Torre maoy direktor sa Criminal Investigation and Detection Group (CIDG) sa PNP, nga gisugdan niini pagkahuman sa pagtudlo kaniadtong miaging tuig. Isip CIDG chief, siya ang nangulo sa pagdakop kang kanhi Presidente Rodrigo Duterte niadtong Marso, subay sa warrant of arrest nga giisyu sa International Criminal Court (ICC) pinaagi sa Interpol.
Sa wala pa kini, si Torre usab ang nangulo sa Police Regional Office sa Davao Region, diin iyang gipangunahan ang pagdumala sa pagdakop sa laing high-profile nga personalidad nga si Apollo Quiboloy, ang founder sa Kingdom of Jesus Christ. Usa sab siya kaniadto nga hepe sa Quezon City Police District hangtod siya mibiya sa maong posisyon niadtong 2023.
Ang turnover of command gikatakda sa Hunyo 2. Samtang sa usa ka Facebook post, nagpasalamat si Police Major General Nicolas Torre III human mapili isip bag-ong PNP chief. Matud pa niya, nangayo siya og pasaylo kung dili niya matubag gilayon ang tanan nga mensahe tungod sa mga pagtimbaya sa iyang bag-ong katungdanan.
