Patay ang usa ka myembro sa pamilya samtang napulo ang naangol sa nahitabong disgrasya pasado alas siyete kaganihang buntag sa Davao Mabini Davao De Oro.
Subay sa inisyal nga taho gikan sa kapulisan, nasayran nga nagsakay ang usa ka pamilya sa usa ka pick-up, apan pag-abot niini sa Crossing Tagnanan sa munisipalidad sa Mabini Davao de Oro, kalit lamang nga mibangga sa Center Island ang nasampit nga sakyanan human nga mibuto ang pangunahan nga ligid sa pick-up.
Tungod sa nahitabo, nabalintong ang sakyanan nga miresulta sa pagkalagpot sa mga biktima ug pagkaguba sa sakyanan. Nasayran nga mokabat sa 11 ka mga indibidwal ang sakay sa nasangpit nga sakyanan nga naangol lakip na niini ang usa nga namatay.
Gikan sumala pa sa Barangay Calablab sa munisipalidad sa Maco, ang mga biktima padulong sa Governor Genoroso aron nga mag-outing. Sumala pa sa kapulisan, usa ka self-accident ang maong panghitabo.
Sa pagkakaron ang mga naangol ang padayon pa nga gitambalan sa hospital. Nagpadayon pa usab ang gihimong imbistigasyon sa kapulisan sa maong panghitabo.
