Mipahibalo na ang NBA veteran ug future Hall of Famer nga si Chris Paul nga ang 2025-26 season mao na ang iyang katapusan nga tuig sa NBA, human sa halos duha ka dekadang pagdominar isip usa sa labing maayong point guards sa kasaysayan.
Sa dili pa magsugod ang duwa nila batok sa Charlotte, mi-upload si Paul og usa ka tribute video nga nagpakita sa labing importanteng highlight sa iyang karera gikan sa iyang pagkapili isip 4th overall pick sa 2005 NBA Draft, hangtod sa iyang mga iconic plays ug leadership moments sa lain-laing teams.
Sulod sa 20 ka tuig sa liga, nakakuha si Paul og daghang dungog ug rekord, lakip na ang:
NBA Rookie of the Year (2006)
4 ka higayon All-NBA First Team
5 ka beses Assist Champion
6 ka beses Steals Leader
7 ka beses All-Defensive First Team, ug
NBA All-Star Game MVP (2013)
Gidugang pa niya sa iyang legacy ang duha ka Olympic gold medals (Beijing 2008 ug London 2012). Sa rekord sa NBA, ikaduha siya sa tanan nga panahon sa assists (12,532) ug ikaduha sab sa steals (2,727). Usa siya sa mga napili sa NBA 75th Anniversary Team niadtong 2021.
Nakadula siya sa pito ka prangkisa: New Orleans, LA Clippers, Houston, OKC, Phoenix, Golden State, ug San Antonio, ug karon mibalik siya sa Clippers, bisan og limitado na ang iyang playing time. Sa unang napulo ka duwa karong season, 2.5 puntos ug 3.3 assists ra ang iyang average.
Human sa usa ka malungtaron ug halangdong karera, nagsugod na ang countdown sa katapusan nga tuig sa usa sa pinakamaalamong playmaker sa NBA history.
