DAVAO CITY – Dungan sa pagsaulog sa dengue awareness month karong bulan sa Hunyo, gipalig-on pa sa ahensiya sa City Health Office (CHO) ang ilang kampanya batok dengue dungan sa panawagan sa katawhan nga batasanon pa gihapon ang pagpalimpiyo sa palibut ilabi na sa breeding site sa mga lamok.
Sumala pa kang Beth Banzon, head sa Tropical Diseases Prevention and Control Unit sa CHO, angayan sumala pa nga subayon ang palibut sa panimalay ug kanunay nga manglimpiyo karong panahon sa ting-ulan kini aron dili makahigayon ang mga lamok nga makapangitlog ug malikayan ang pagsaka sa kaso sa dengue.
Nanawagan sab ang opisyal sa publiko nga suportahan ang 4-S sa ahensiya diin sakop niini ang fogging ug uban pang mga lakang sa pagpakgang sa dengue.
Gi-awhag sab sa ahensiya ang katawhan nga kung makasinate kini ug mga sintomas sa dengue, gilayon nga makiglambigit sa mga doktor.
Gitambagan sab niini ang publiko nga kung magpundo ug tubig kinahanglan nga takloban kini aron nga dili puy-an ug mga lamok.
