DAVAO CITY – Nagpahimangno ang City Health Office (CHO) ngadto sa publiko nga kinahanglan moinom ug daghanan tubig karong panahon sa summer sanglit masinatian ang pagbag-o-bag-o sa klima nga mamahimong hinungdan sa pipila ka mga balatian.
Kahinumduman nga nabati karon sa dakbayan ang sobra kainit sa panahon apan kalit na lamang mga mobundak ang kusog nga ulan panahon sa kahaponon.
Sumala pa kang Dr. Josephine Villafuerte, hepe sa City Health Office (CHO) nga kinahanglan ipabilin nga lig-on ang immune system ug moinom ug daghanang tubig aron nga pabilin nga hydrated.
Nasayran sa opisyal nga sagad sa mga makuha nga sakit panahon nga magbag-o ang klima ang gilangkuban sa respiratory tract infection ingon man kalintura.
Gitambagan sab ni Villafuerte ang publiko nga maghinay-hinay sa mga gipangkaon ug molikay sa grabe nga bisyo.
Kung molakaw nga init ang panahon, mas maayong magdala kanunay ug tubig.
