Nakapahigayon og prenatal care ang Lokal nga panggamhanan sa Davao, pinaagi sa City Health Office (CHO), ngadto sa 23,422 nga mga buntis atong 2024.
Ang maong ihap adunay katugbang nga 87.2% gikan sa 26,867 ka mga kababaihan nga nanginahanglan og labor ug delivery services sa CHO.
Sumala pa ni Dr. Sharlene Tan, District Health Physician sa CHO, nga ang prenatal care service magamit sa tanan nga health center ug barangay health station ning dakbayan sa Davao.
Diin ang maong serbisyo gilangkoban sa libre nga mga supplements susama sa ferrous ug folic acid, calcium tablets, Tetanus ug Diphtheria vaccines, laboratory screenings, ug HIV tests.
Gipasabot usab niini nga ang mga pasyente nga adunay Philhealth mamahimo nga gamiton ang E-Consulta package alang sa mga laboratory, diin gilangkoban kini og CBC kon Complete Blood Count, urinalysis, and FBS kon fasting blood sugar ug ang bayaran na lamang mao ang Hepatitis B test ug ang syphilis test, apan, gamay na lamang sumala pa ang bayaran tandi sa mga private hospital.
Gipasabot usab ni Tan, nga importante ang prenatal care aron malikayan ang mga komplikasyon sa pagbuntis ug sayu sumala pa makita kung adunay masinati nga problema susama sa diabetes ug high blood pressure.
Samtang, giawhag ni Lea Gunabe, ang Safe Motherhood Program Coordinator, ang mga buntis nga magpahimulos sa mga birthing facilities sa CHO nga anaa sa mga distrito susama sa Paquibato, Marilog, Bunawan, Tibungco, Agdao, Buhangin, ug Toril.
Dugang pa niini, nga likayan na ang paggamit sa “hilot” ingon man ang pagdumala og mga home births, ilabi na sa mga Geographically Isolated and Disadvantaged Areas (GIDA).
