DAVAO CITY – Girekomenda karon sa City Health Office (CHO) ang hingpit na nga pagdili sa paggamit sa bomba sa tubig sa Sitio Balon Barangay Tigatto Buhangin ning dakbayan human nga gipagula na ang resulta sa gipahigayon nga test diin kontaminado kini sa daghanang bacteria.
Kahinumduman nga pipila ka mga residente ang nakasinate diarrhea nga maoy hinungdan sa kamatayon sa pipila niini samtang ubay-ubay sab ang nadala sa balay tambalanan.
Sa migula nga resulta sa gipahigayon nga Bacteriological water examination, wala girekomenda ang pag-inom ug tubig sa nahisgutan nga balon sanglit napuno kini ug coliform formation nga dili ha-um nga imnon sa usa ka katao.
Una ng gibutyag ni Barangay Capt. Lito Lapitan nga adunay usa ka singko anyos nga bata ang nadugang sa mga nadala sa balay tambalanan human nga nakasinate sab kini ug diarrhea samtang usa pa ka hamtong nga residente sa lugar kinsa miuli sa bukidnon ang gimonitor sab karon human nga nakasinate sab kini ug susama nga sintomas.
Halos magparyente lamang ang mga biktima na nadala sa balay tambalanan.
