Gipasakahan na og kaso ang Upat ka mga suspetsado, lakip na ang usa ka Chinese national, human nga nadakpan sa gipahigayon nga operasyon sa mga otoridad tungod sa pagpalusot og iligal nga sigarilyo dinhi sa syudad.
Ang mga suspetsado gipasakahan og kaso nga pagsupak sa Republic Act 10643 kon (Graphic Health Warning Law).
Una ng gilusad sa kapulisan ang operasyon niadtong Hwebes sa buntag sa pagpanguna sa Davao City Police Special Operations Group (CSOG) nga miresulta sa pagkasikop sa Upat ka mga dinakpan nga lakip na niini ang Chinese national,diin nasakmit ang kapin P1.2 milyon nga kantidad sa smuggled cigarettes.
Nadakpan ang mga nahisgutan sa Barangay Paciano Bangoy ning syudad diin giila ang mga dinakpan nga sila Radjiel, 27 anyos, ug Radzmir, 46 anyos, pulos mga Pilipino nga taga-Sulu, ug si Ke, 47 anyos, nga usa ka Chinese national.
Nakumpiska sa mga otoridad pasado ala-1:00 sa kaadlawon samtang naobserbahan sa usa ka patrol team ang ilahang pag-unload og mga master case sa ilegal nga sigarilyo gikan sa usa ka Isuzu closed van sa Carmen Street, Bo. Obrero.
Mokabat sa 20 ka master cases sa ilegal nga sigarilyo nga adunay gibanabanaan nga market value nga P1,200,000. Sumala pa sa kapulisan nga ang nasampit nga operasyon ang kabahin sa mas halapad nga monitoring ug surveillance operation batok sa mga kriminál nga kalihukan sa lugar.
Samtang, nadakpan usab sa Highway Patrol Group (HPG) XI ang usa ka giila nga alias “Norjan”, residente sa Muslim Village, Ilang, atol sa usa ka pursuit operation pasado ala 1:00 sa hapon sa Barangay Mudiang, Bunawan District.
Subay sa report, naghimo og anti-carnapping operation ang team sa Barangay Acacia sa dihang ilahang nakita ang Suzuki Mini Van nga kusog nga ni-U-turn.
Misulay sumala pa ang drayber sa pagpalayo apan napakyas sa pagpalayo sa sakyanan ug nabangga kini sa usa ka water refilling station.
Sa inspeksyon, nakit-an sa mga otoridad ang 21 ka kahon sa mga sigarilyong walay dokumento nga adunay gibanabanaan nga kantidad nga mokabat sa ₱346,000.Ang mga nasakmit nga sigarilyo ang anaa na sa kostudiya sa Bureau of Customs Region XI.
