DAVAO CITY – Plano sumala pa sa China nga magpahimutang ug consulate dinhi sa dakbayan sa Davao aron nga makapahigayon ug economic ug trade activities ug mapalambo pa ang mga nagkadaiyang transaksiyon ilabi na nga nagkadaghan sumala pa ang ihap sa mga Chinese nationals nga anaa karon sa siyudad.
Una ng gibutyag ni Representative Jericho Nograles nga ang gi-abandona nga pinuy-anan nga nahimutang sa atubangan sa Sta. Ana church mao ang karaan nga Chinese Consulate nga nagpabilin pa gihapon nga propedad sa China ug posibleng subli kini nga ablihan sa umaabot nga panahon.
Dugang sa opisyal nga adunay bag-ong gi-appoint karon ang China isip bag-ong Consul General nga idestino sa Cebu ug Davao.
Kahinumduman nga sakop kaniadto ang siyudad sa Davao sa consular district sa China nga nahimutang sa Cebu.
Ang consular office gitahasan nga mo-assist sa legal transactions sama sa pag-proseso ug visa application ingon man pagprotekta sa ilang mga kababayan.
Kaniadtong Oktubre milabay nga tuig, adunay nahimong kasabutan si Pangulong Rodrigo Duterte ug Chinese President Xi Jinping kalabot sa posibilidad nga magmugna ug People’s Republic of China Consulate dinhi sa dakbayan.
