Nagtuo ang Department of Foreign Affairs (DFA) nga dili makatabang sa “maayo ug himsog” nga relasyon sa Pilipinas ug China ang pagdili sa Beijing sa pagsulod sa mga opisyal sa Kalayaan, Palawan.
Gipugngan sa China ang pagsulod sa 16 ka mga opisyal sa Kalayaan, lakip ang Hong Kong ug Macao, human ideklarang persona non grata sa lokal nga gobyerno ang Chinese Ambassador nga si Jing Quan tungod sa giingong paglapas sa diplomatic protocol ug panghilabot sa internal affairs sa Pilipinas.
Sumala sa DFA, bisan pa og katungod sa usa ka nasod ang magpatuman og travel ban, dili kini makatabang sa pagpalig-on sa bilateral relations ug people-to-people exchanges nga kauban nga gisaad sa Pilipinas ug China.
Ang Kalayaan mao ang nag-inusarang munisipalidad sa Pilipinas nga nahimutang sa West Philippine Sea.
Padayon gihapon nga giangkon sa China ang halos tibuok dagat bisan pa sa international ruling nga nag-ingon nga walay legal nga basehan ang ilahang claim.
Sa miaging mga tuig, misamot usab ang tensyon tali sa duha ka mga nasod tungod sa mga insidente sa dagat, lakip ang panagbangga ug paggamit og water cannon batok sa mga barkong Pilipino.
