Gikatakdang ablihan sa publiko karong Mayo 1, 2025, ang bag-ong Children’s and Water Park nga nahimutang sa Energy Park, Barangay Apokon, Tagum City. Ang maong proyekto gitumong aron mahatagan og libre ug luwas nga lugar ang kabataang Tagumenyo ug mga bisita alang sa ilang kalingawan.
Sa ulahing inspeksyon, nahuman na ang pagpintura sa grounds ug pag-instalar sa nagkalain-laing mga playsets sama sa outdoor playground, slides, swings, seesaw, ug monkey bars. Gisiguro usab ang kaluwasan sa mga magdula pinaagi sa pagbutang og mga safety railings ug protective mats sa matag playset.
Ang proyekto nagkantidad og P20 milyon nga pondo gikan sa Lokal nga Pangagamhanan sa Dakbayan sa Tagum, ug naglangkob kini og 1.5 ektarya. Gikanayon nga dili lang taga-Tagum ang mobisita, apan lakip na ang mga silingang lungsod aron malingaw. Libre usab kini nga ma-experyensyahan sa tanan ug gilauman nga mahimong iconic nga destinasyon sa siyudad.
