“Ang gaba dili magsaba”, maoy ingun sa mga pipila ka residente human nga gidaro sa dakong truck kagahapon sa buntag ang gipahigayon nga checkpoint sa kapulisan nga gimuntar didto sa Barangay Cawayan padulong ug Barangay Tamayong nga dalan.
Makita niini nga nadasok sa kilid nga bahin sa kalsada ang dako nga truck ug nagkatag usab ang mga barikada nga gipangbutang sa mga pulis nga ginagamit usab nila sa checkpoint operation.
Sumala pa sa mga nakakita, paspas matud pa ang padagan sa maong truck hinungdan nga diretsu kini ngadto sa mga kapulisan nga nagpahigayon ug checkpoint.
Apan padayon pa gihapon nga ginasuta sa mga otoridad ang hinungdan sa maong panghitabo. Hinuon, walay naalaot nga kinabuhi sa maong insidente.
Naingun sumala pa sa mga residente ang terminolohiya nga ang gaba dili magsaba, gumikan kana sa gipagula usab nga pamahayag ni VP Sara niadtong adlawong dominggo sa gabii, nga diin gidasig niini ang mga taga KOJC nunot pa man sa mga kaguliyang sa ilahang palibut.
Ang maong dalan nga diin nahitabo ang disgrasya, maoy dalan usab padulong sa Prayer Mountain ug Glory Mountain nga gipanag-iyahan ni Pastor Apollo Quiboloy ug mga taga KOJC.
