-- ADVERTISEMENT --
Gisugyot karon sa Philippine National Police (PNP) ang pagtukod og mga “centralized market” alang sa baligyaanan sa mga pabuto aron maseguro ang kaluwasan sa publiko karong umaabot nga Bag-ong Tuig.
Gimandoan na ni PNP Chief Police Lieutenant General Jose Melencio Nartatez Jr. ang tanang hepe sa kapulisan nga makig-alayon sa mga lokal nga kagamhanan aron sa pagpangita og haom nga mga dapit alang niini.
Matod ni Nartatez, mas sayon nilang mabantayan ug madakpan ang mga ilegal nga pabuto kon adunay usa lang ka designated zone sa matag lungsod o dakbayan.
Kini nga lakang gihimo tungod sa pagsaka sa gidaghanon sa mga biktima nga nasamdan sa pabuto nga natala na sa Department of Health sa miaging mga adlaw.
